Nauram ti sumagmamano a lugan a nakaparada iti Ninoy Aquino International Airport (NAIA) Terminal 3 idi kalman, Abril 22 iti agdama a tawen.
Sigun kadagiti otoridad ti Manila International Airport, posible a grass fire nga intunda ti kinabara ti panawen ti rason iti panakauram ti baente a lugan a nangrugi iti pasado ala una ti malem ken naideklara a fire out ti pasado alas dos iti isu metlaeng nga aldaw.
Nupay kasta, awan ti nadangran iti nasao nga insidente ken saan a naapektaran dagiti flight operations.
Kabayatanna, inwaragawag ni Eric Ines, general manager ti Manila International Authority a tulonganda dagiti apektado a makisarita iti parking concessionaire a mangpatpataray iti pay-per-parking tapno maikeddeng ti tulong nga ipaay ti firm kadagiti apektado a makinkukua kadagiti nauram a lugan.
Kasaruno daytoy ti imbaga ni Chris Bendijo, spokesman ti nasao nga ahensia nga awan ti sungsungbatan ti NAIA iti nasao nga insidente.
