BAGUIO CITY – Nangidonar ni Benguet Congressman Eric Go Yap iti sangaribo a kilo ti asin iti Bureau of Fire and Protection – Benguet para iti naituding a pannakaipatungpal ti cloud seeding.
Sigun iti manmanday-linteg, kasapulan ti proactive measures tapno matulongan dagiti nagduduma a line agencies tapno masebseban dagiti kumarkaro a forest fires iti probinsya ti Benguet.
Immuna iti daytoy ket nakitaripnong ti Benguet solon kada Office of Civil Defense Cordillera Regional Director Albert Mogol, representatives manipud Philippine Air Force ken Bureau of Fire and Protection tapno pagsaritaan dagiti solusyon tapno maprebentaran pay dagiti kumarkaro a pannaka-uram dagiti kabakiran.
Innayon pay ni Yap nga umdasen ti asin tapno agpataud ti tudo babaen iti cloud seeding nga ipatungpal ti Philippine Airforce a mangsebseb kadagiti napipigsa nga uram kadagiti kabanbantayan.
Binilin na pay dagiti nadakamat nga ahensya nu anya pay dagiti pagkasapulan da tapno dagus a mang-asistar ti opisina na iti kabiitan a panawen.
Naipadamag a mabayag ti procurement process ti panaggatang ti asin rason nu apay a maitantantan dagiti government operations ken dioty metten a nagkari ni Yap nga isunan ti gumatang.
Nagkari pay ti congressman ti legislative action tapno maamuan ti ramot dagiti mapaspasamak nga uram tapno mapatawan ti nadagdagsen a pannusa dagiti forest arsonists.
Nagpanawagan pay ti opisina na iti publiko iti panagannad ken dagus nga iyuman kadagiti otoridad iti anya a klase ti uram a mapaspasamak iti aglawlaw dagitoy.//Bombo Jordan Tablac
