Inlawlawag ni Vice President Sara Duterte saan a pangta ti kinunana a mapapatay da Presidente Ferdinand Marcos Jr., Speaker Martin Romualdez, ken First Lady Liza Araneta Marcos.
Sigun kenkuana, impeksana laeng ti mapapati a pangta iti seguridadna.
Indilig pay ti bise presidente ti immuna a sasaona a nu agtultuloy ti panagatakeda kenkuana ket kalienna ti bangkay ni sigud a President Ferdinand Marcos Sr. ken ibellengna iti West Philippine Sea.
Ti statement ni Duterte nga ”assassination” ket bayat ti virtual press conference idi kalman ti agsapa nu sadinno, binabalawna ti pammilin ti House of Representatives a pannakaiyakar ni Atty. Zuleika Lopez manipod iti House detention facility paturong iti Correctional Institution for Women idiay Mandaluyong City.
Naibilin a maibalud ni Lopez iti Kongreso kalpasan a na-“cite in contempt” gapu iti maipagarup a saan a diretso a panagsungbatna ti maipapan ti confidential funds bayat ti imbestigasion ti Quad Committe.
Kabayatanna, kinuna met ti Presidential Communications Office (PCO) a ti statement nga inaramid ni Duterte ket dagos a naipadamag iti Presidential Security Command (PSC) para iti napartak a tignay.
Iti statement ti PSC, kinunana nga impatungpalda ti naing-inget a security measures tapno masalakniban ni Marcos ken ti pamiliana.
Kinuna met ti Philippine National Police (PNP) a mangipatungpalda ti imbestigasion iti statement ni Duterte.
