Imbinglay ni sigud a Budget Secretary ken Liberal Party member Florencio Abad a saan nga ikkaten ti posibilidad a babbai ti agsasango inton 2028 Presidential and Local Elections.
Daytoy ket kalpasan iti panangideklara ni Vice President Sara Duterte iti panagngayangay daytoy kas presidente inton sumaruno nga eleksyon.
Sigun kenni Abad, posible nga maaddaan to ti tandem da Vice President Sara Duterte ken Senator Imee Marcos inton sumaruno nga eleksyon.
Immunan nga impakaammo ni Senator Imee Marcos a nakasagana daytoy nga agbalin nga ‘forever running mate’ ni Vice President Sara Duterte kalpasan iti panangideklara daytoy iti panagtarayna inton sumaruno nga eleksyon.
Innayona a posible met ti panagtaray ni sigud a Vice President wenno mannarimaan a mayor ni Naga City a ni Mayor Leni Robredo kas presidente kaduana ni Senator Risa Hontiveros kas ka-tandem na.
Sigun iti sigud nga opisyal, nu saan a mapasamak ti dinakamatna, mabalin metlaeng nga agbalin nga standard bearer para iti oposisyon ni Senator Risa Hontiveros nangnangruna ta impakita met ti senador a kabaelanna a mangidalan. // Bombo Karen Calpoe Sapirao
