BAGUIO CITY – Naituloyen ti panangisayangkat dagiti opisina ti COMELEC kadagiti munisipyo ditoy rehion iti satellite registration kadagiti babbarangay.
Iti interview ti Bombo Radyo Baguio, kinuna ni COMELEC-Cordillera Regional Director Atty. Julius Torres a nangrugi ti nasao a panagparehistro idi napalabas a lawas nupay daytoy ket maisayangkat laeng iti aldaw ti SABADO.
Kinunana a babaen iti daytoy ket maiyasideg da ti serbisyo ti komisyon kadagiti umili dagiti aadayo a barangay a saan a makapan iti opisinada iti sentro ti munisipyo.
Innayonna a sakbay ti panakaisayangkat ti satellite registration ket nasken nga adda ti koordinasyon dagiti personnel ti COMELEC iti maseknan a lokal a gobyerno ken iti municipal health office para iti panakaisigurado ti kinatalged ti amin manipud iti COVID-19.
Sigun kenkuana, nasken a masurot ti pagalagadan a ti pakaisayangkatan ti satellite registration ket awanan ti kaso ti COVID-19 ken dagiti personnel ti komisyon ket awanan ti imet a virus iti panagturongda kadagiti barangay.
Mangnamnamada a babaen iti panakaituloy ti satellite registration ket manayonan ti bilang dagiti umili nga agparehistro para iti sumaruno nga eleksion.
