Inyunay-unay ni Congressman Mauricio Domogan a saan a pudno dagiti alegasyon nga adda ti panangbutbuteng ken naikari a proyekto dagiti kongresista a pumabor iti impeachment complaint kontra kenni Vice President Sara Duterte.
Rimwar ti nasao nga alegasyon kalpasan a naiwaragawag a masapul nga adda ti 1/3 wenno 106 a miyembro ti kongreso nga agbotos wenno mangpabor iti impeachment sakbay a maipasa ti Articles of Impeachment iti Senado nga isu ti agserbi kas Impeachment Court
Sigun kenni Domogan, tunggal distrito nga ireprepresentar ti maysa a mammanday-linteg ket siguden nga addaanen iti budget allocations nga isu ti maaramat iti nagduduma a proyekto.
Kinunana a ti nasao nga alegasyon ket ul-ulawenna laeng ti isyu.
Impettengna a kas maysa a kongresista, ti kitkitaenna ket dagiti ebidensiya nga iparparang dagiti complainant ken saan a ti dadduma a banag a kas iti madakdakamat iti alegasyon.
Innayonna pay a dagiti ebidensiya kontra kenni Vice President Sara Duterte ket saan nga inimbento ti Kongreso nu di ket mismo a naibasar iti aktual a record a pinirmaan metlaeng ti bise presidente.
