BAGUIO CITY – Natiliw manen ti babai nga scammer a nangbikbiktima kadagiti online sellers ken flower vendors ditoy siudad ti Baguio.
Nabigbig daytoy a ni Rovi Anne Mari Traballo Fernandez alyas “Gemmalyn Villanueva Flores”, 26-anyos ken residente ti Middle Quezon Hill, Baguio City.
Natiliw daytoy iti maikadua a gundaway idi malem kalman iti deppaar ti Panagbenga Park babaen iti panangiserbi dagiti otoridad iti warrant of arrest daytoy.
Ti warrant of arrest ket para iti kaso ni Fernandez a dua a bilang ti panagtakaw nga addaan ti piyansa a P20,000.
Impaulog ni Presiding Judge Alfred Alex Castillo ti 2nd Judicial Region, 6th MCTC, San Mariano-Benito Soliven, Isabela ti nasao a warrant of arrest.
Maibasar iti report ti PNP-Regional Anti-Cybercrime Unit (RACU) Cordillera, dimmar-ay ni Fernandez ken dagiti kameng ti pamilyana iti maysa a kallaysa sadiay Isabela idi 2018.
Kalpasanna, nagkokomplot dagitoy a nangtakaw iti pouch bag a naglaon ti P34.5-K.
Naibiyahen daytoy paturong sadiay Isabela ken manamnama nga agpiyansa.
Maipalagip a natilliw ni Fernandez idi napalabas a lawas iti entrapment operation nga insayangkat ti RACU Cordillera kalpasan nga inreklamo ti online seller a biniktimana.
Kalpasan ti panakatiliwna ket nanayonan pay dagiti nagipila ti reklamo kontra kenkuana, pakairamanan dagiti flower vendors ditoy siudad a gimmatanganna ti money money bouquet ngem awan karga ti impatulodna a kopya ti resibo ti bayadna.
Naamuan nga alyas laeng ti inaramatna a nagan a ‘Gemmalyn Flores’.
Nagpiyansa daytoy iti kasona nga estafa agingga a natiliw manen idi kalman iti kasona a panagtakaw.
