Baguio City- Bilang bahagi ng pagpapalakas ng lokal na workforce at pagbibigay ng mas inklusibong oportunidad sa kabuhayan, inihain ni Councilor Leandro Yangot Jr. ang isang ordinansa na magtatatag ng Technical-Vocational (TechVoc) Scholarship Program para sa mga residente ng Baguio City.
Layunin ng programa na tugunan ang kakulangan sa kasanayang kailangan ng lokal na industriya habang tinutulungan ang out-of-school youth, displaced workers, persons with disabilities, at indigenous peoples. Saklaw ng scholarship ang tuition at miscellaneous fees, competency exams, at starter toolkits upang ihanda ang mga benepisyaryo sa trabaho o pagnenegosyo.
Batay sa taunang labor market analysis, tututok ang programa sa creative industries, tourism at hospitality, at construction at manufacturing. Kwalipikado ang mga aplikanteng residente ng Baguio nang hindi bababa sa isang taon, may mabuting asal, may pinansyal na pangangailangan ayon sa CSWDO, at hindi benepisyaryo ng ibang government scholarship.
Bilang kapalit, lalahok ang mga iskolar sa Return Service Program para sa mga proyekto ng lungsod at barangay. Pangangasiwaan ang programa ng TechVoc Management Committee, at inaatasan ang pagbubuo ng IRR sa loob ng 60 araw.
Naaprubahan ang panukala sa unang pagbasa noong Enero 26, 2026, at kasalukuyang sinusuri ng kaukulang komite ng Baguio City Council.
