BAGUIO CITY – Mangnamnama ti mayor ti Itogon, Benguet a mabirukanen ti bagi ti naiyanod a bagi ti balasitang iti Agno River sadiay Sitio Salapsap, Dalupirip, Itogon, Benguet idi pay Oktobre 23.
Iti interview ti Bombo Radyo, kinuna ni Mayor Bernard Waclin, agtultuloy paylaeng ti search and rescue operation nga ipatpatungpal dagiti barangay officials, pulisya, personnel ti Municipal Disaster Risk Reduction and Management Council ken dadduma pay a volunteers.
Innayon pay Waclin a nangalada payen kadagiti nalaing a lumangoy manipud La Union babaen iti opisina ti Civil Defense Cordillera tapno tumulong iti search and rescue operation.
Impetteng met ti mayor nga imparikepnan ti nasao a karayan para kadagiti umili ken bisita gaputa ado metten ti naiyan-anod sadiay.
Maipalagip nga idi malem ti Oktobre 23, nagpakada da Colleen Chance Flores, 16-anyos ken Cherry Leigh Pangang-at, 15-anyos kadagiti nagannakda tapno apanda agdigus.
Ballasiwen koma dagitoy ti Agno River tapno apanda aglangoy iti bangir a karayan idi killaat a pimmigsa ti ayos ti danum rason a naiyanod dagitoy.
Naispal ni Cherry kalpasan nga adda ti dakkel a bato a nag-iggemanna bayat a naan anay a naiyanod ni Colleen.
Kasaruno iti daytoy, nagballaag met ni Mayor Waclin kadagiti pamilya nga agpangpanggep nga aglangoy iti umadanin a holiday nga agganad dagitoy tapno maliklikan ti kapada nga insidente.
