Agtultuloy ti Search and Rescue (SAR) operations ti Philippine Coast Guard (PCG) kadagiti posible pay a biktima MV Trisha Kerstin 3, ti barko a limned iti baybay a sakupen ti Basilan.
Temporaryo a sinuspendir ti coast guard ti diving operation idi Huwebes, Enero 5 kagiddan iti pangta iti panawen gapu iti bagyong Basyang.
Nupay kasta, nagtuloy manen daytoy idi kalman, no sadino ket dagos a nangideploy ti Philippine Coast Guard kadagiti technical divers ken assets iti ground zero tapno maituloy ti panangbirok kadagiti mapukpukaw a bangkay.
Sigun kenni PCG Spokesperson Capt. Noemie Cayabyab, maysa kadagiti kaunaan a kitaen dagiti divers ket iti mismo a lokasyon ti barko.
Dakkel met ita a karit kadagiti forensic experts dagiti estado dagiti bangkay a marekrekober nangnangruna dagiti nababad iti baybay iti agarup maysa a lawas.
Sigun kenni Capt. Vandolf Valmoria, medico-legal officer ti Zamboanga Peninsula police forensics unit, saan payen nga natalged nga eksaminen dagiti dadduma gapu kaaduan a narekober a bangkay gapu iti nagduduma nga biological hazards.
Saan met a bumababa iti bilang nga sangapulo dagiti sarsaraken dagiti drivers iti agdama. // Bombo Karen Calpoe Sapirao