Agtultuloy latta ti Search, Rescue, and Retrieval (SRR) operation nga isaysayangkat dagiti otoridad ken volunteers para iti panangsarak iti mapukpukaw a babae a menor de edad idiay Sagada.
Naipatungpal pay ti maysa a ritual iti Municipal Ato idi kalman sakbay a nagturong ti grupo kadagiti kuweba iti nasao a lugar partikular iti Manes Cave ken kadagiti asideg nga areas.
Kanayunanna, nagturong ti maysa pay a grupo manipud Omfeg, Bontoc Ili iti waterways manipud Malitep agingga Suyo.
Nakikoordinar met ti maysa a grupo wenno ti Team Chakchakan para iti pannakadeploy ti tattao nga agsarak manipud Payageo agingga Suyo.
Immuna metten a nakipaset ti probinsya ti Kalinga iti nasao nga operation no sadino nangisayangkatda iti river watch ken monitoring idiay Chico River.
Agingga iti agdama, nakamonitor pay laeng dagiti nasao grupo sadiay iti posibilidad a naiyanod ti biktima iti nasao a karayan.
Agtuloy met ti operasyon inton bigat, Agosto 20, no sadino makadua dagiti rescue team ti kanayunan a personnel ken K9 Search and Rescue Units manipud BFP-NCR nga impatulod ti Bureau of Fire Protection – National Headquarters.
Pokus da iti maika-12 nga aldaw ti panangsarak kadagiti babbalay paturong kadagiti naidisignar nga dispatch area dagiti grupo.
Kabayatanna, sigun iti pablaak ti Bureau of Fire and Protection-Sagada Fire Station, agleppas ti Search, Rescue, and Retrieval (SRR) operation inton Agosto 23 masarakan man wenno saan ti biktima.
Nupay kasta, mangnamnama latta dagiti amin a rescue team, kapamilya ti biktima, ken komunidad ti Sagada a masarakan ti nasao a biktima.//𝓴𝓬𝓼//