BAGUIO CITY – Agtultuloy ti search and rescue operation para iti panakaispal ti tour guide a naiyanod iti Victoria Cave sadiay Sitio Maduto, Angkeling, Sagada, Mt. Province idi kalman.
Binigbig ni PSIns. Domingo Gambican, dadaulo ti Sagada Municipal Police Station ti nasao a tour guide a ni Roderick Malecdan, adda iti legal nga edad.
Kinunana a nag-log-in iti Tourist Guide Office dagiti pito a tour guides tapnu kitaenda ti uneg ti nasao a gukayab ngem nagtudo iti napigsa a nangitunda tapnu ngumato ti lebel ti danum iti uneg ti Victoria Cave.
Inlawlawagna a ti nasao a gukayab ket saan pay laeng a nailukat iti publiko ken iti agdama ket maad-adal pay laeng ti uneg daytoy.
Kinunana a kalpasan nga immuneg iti gukayab dagiti nasao nga indibidual ket immuna a rimwar ti uppat bayat a naispal met ti dua.
Innayonna a nabirukandan ti lokasyon ni Malecdan ngem dumanon iti 1.5 kilometers ti ka-adayo daytoy manipud iti wangawangan ti gukayab.
Dinakamatna nga adda ti uppat a pagtinnagan ti danum sadiay ken adda ti 50 meters a kasapulan a langoyen dagitoy.
Inaklonna pay nga agingga ita ket saanda pay laeng nga ammo ti pagruaran ti danum nga umuneg iti nasao a gukayab.
