BAGUIO CITY – Agtultuloy ti ipatpatungpal a search and rescue operations dagiti pulis, fire station ken local responders tapnu mabirukan ti ubing a naiyanod iti Ahin River sadiay Tinoc, Ifugao idi kanikadua.
Nabigbig daytoy a ni Jaypee Martin Mat-an, 6-anyos, kindergarten pupil ken residente ti Ahin, Tinoc, Ifugao.
Maibasar iti report, nagturong ti biktima ken dagiti tallo a kakaduana iti nasao a karayan tapnu agdigus iti nagbaetan ti alas dose ti pangaldaw agingga ala una ti malem idi agosto dos.
Nagtakder ti biktima ken dagiti kakaduana iti dakkel a bato idi killaat daytoy a naikadlis ken natnag iti karayan.
Ginandat dagiti kakaduana nga ispalen ti ubing ngem naiyanod daytoy iti napegges nga ayos ti danum ti karayan.
Kumkumpirmaren met ti DILG-Cordillera ken DOH-Cordillera no ti insidente ket adda pakainaiganna iti monsoon rains wenno awan.
