BAGUIO CITY–Agtultuloy ti mano-mano a search retrieval operation sadiay Lucnab Barangay ditoy siudad ti Baguio kalpasan a saan paylaeng a nabirbirukan ti dua nga indibidual a nagaburan iti panagreggaay ti daga sadiay.
Iti panakiyuman ti Bombo Radyo kenni Punong Barangay Enrique Lindawan, kinunana a narigat ti panagbiruk dagitoy gaputa saanda nga ammo no nagaburan wenno saan ket naiturongen iti San Roque dagiti mapukpukaw.
Kinunana nga idi kalman ket nasuspindir ti panakipaset dagiti pulis ken militar iti nasao a panagbiruk ngem adda latta dagiti residente sadiay nga agtultuloy nga agsapsapol.
Dinakamatna a kalkalyenda latta ti mismo a nagtaudan ti panagreggaay ken batbatokenda dagiti nauuneg a paset dagiti dissuor iti karayan.
Maipalagip a dagiti mabirbiruk ket da John Lee Viernes ken Celso Calso kalpasan a nagaburan dagitoy kabayatan ti panagdalusda iti pinanawanda a pagtaengan sadiay deppaar ti PMA-Loakan Road.
