BAGUIO CITY–Awan paylaeng ti second wave ti covid-19 infection iti probinsya ti Benguet sigun kenni Governor Melchor Diclas.
Kinuna iti Bombo Radyo Baguio ni Governor Diclas a ti National IATF ti agdesisyon iti panakaideklara ti second wave iti covid-19 infection iti maysa a probinsya wennu iti intero a pagilian.
Kinunana pay a saan met unay a nangato ti kaso ti covid-19 iti probinsiya a dumanon itan iti 67, no sadino, 49 ti immimbag bayat a 18 ti matamtamig iti Benguet General Hospital.
Nupay kasta, inyunay-unayna a nasken latta nga agridam ti publiko tapnu saanen a manayunan ti nasao a kaso ken tapnu agsublin iti normal ti sitwasyon ti probinsya ken iti rehiyon Cordillera.
Sigun pay kenkuana, agtultuloy latta ti expanded testing a maisaysayangkat iti probinsya, nu sadino, prioridad iti daytoy dagiti indibidual a nakapulapol dagiti pasyente iti covid-19.
Kabayatanna, maragsakan ti opisyal agsipudta asidegen a maileppas ti Molecular Testing Laboratory iti Benguet a pinundoan ni ACT-CIS partylist Representative ken Benguet Caretaker Eric Go Yap.
Kinunana a manamnama a maaramaten daytoy inton Agosto ken madama metten ti panagsanay dagiti medical technologist a mangimaton iti daytoy ken rinugianda metten a gumatang iti kanayunan a medical equipments para iti nasao nga laboratoryo.