Inaprobaran ti security cabinet ti Israel ti plano a mangpalawa iti opensiba militar kontra iti Hamas a pakairamanan ti panangala iti Gaza ken panangtengngel iti teritoriona, sigun iti maysa nga opisial ti Israel.
Nadamat a karaman pay ditoy ti panangyakar kadagiti 2.1 a milion a Palestinian idiay Gaza nga agturong iti abagatan, a mabalin a mangpakaro iti “humanitarian crisis.”
Inawagan ni Prime Minister Benjamin Netanyahu kas maysa a nasayaat a plano ti nasao a banag gaputa maragpatna ti panggepda a maabak ti Hamas ken maisubli dagiti nabatbati a kautibo, sigun iti nasao nga opisial.
Inaprobaran pay ti security cabinet ti planoda a panangitulod ken panangiwaras iti humanitarian aid babaen kadagiti pribado a kompania.
Ngem sigun iti United Nations ken dadduma pay nga ahensia a tumultulong, ti singasing ket pananglabsing kadagiti kangrunaan a humanitarian principles ken saanda a makitinnulong.
Sigun met iti Hamas, ti singasing ti Israel ket katukadna ti “political blackmail”.
