Maladladingitan ni Atty. Mauricio Domogan, sigud a Mayor ken Congressman iti Baguio City kalpasan a na-ban ti aksesna iti golf course idiay Camp John Hay.
Iti eksklusibo a panakiuman ti Bombo Radyo kenni Atty.Domogan,ti makitkitada a rason iti nagbalin a tignay ti Bases Conversion and Development Authority a banning kadakuada ket ti impila dagitoy a civil case kontra iti nasao a government-owned corporation.
Ti nasao civil case ket mainaig iti saan a panangkanunong da Atty.Domogan ken daduma pay iti panakaiyakar iti golf course ken club house iti kontrol iti BCDA.
Iti baet a mangnamnama ni Atty. Domogan a saanen a maipila ti kaso, kinunana a posible a mapilitanda a mang-amyendar iti civil case nga impilada kaspangarigan saan a marisut ti nasao a pakaseknan.
Innayon ti sigud a local chief executive a rumbeng a bigbigen iti BCDA ti security dagiti miembro iti golf course ken ti clubhouse kasta met a masapol a saan a mapukawan iti panggedan dagiti trabahador iti daytoy.
Maipalagip nga idi laeng napan na bulan ket inruar ti Korte Suprema ti pinal a pangngeddeng daytoy a maiyakar ti Camp Joh Hay iti kontrol iti government-owned corporation a Bases Conversion and Development Authority manipod iti Camp John Hay Development Corporation (CJH DevCo).
Inlawlawag ni Atty. Domogan nga awan ti parikutda iti nagbalin a panggeddeng ti Korte Suprema gapu ta ti tarigagayda ket mapagtalinaed ti “security” dagiti miembro iti nasao a sanikua.
Kabayatanna, impasiguradona a matuloy ladta ti panakaipatungpal iti Chairman’s Cup inton bulan ti Marso ita a tawen.//Bombo Mera Pacpacan
