Security guard a wanted gapu iti kasona a murder, natiliw idiay Ifugao kalpasan ti sangapulo ket siyam a tawen a panaglemmengna

LAMUT, IFUGAO – Natiliwen ti security guard a wanted gapu iti kasona a murder kalpasan ti sangapulo ket siyam a tawen a panaglemmengna.

Natiliw daytoy idi kalman, Abril 2, idiay Barangay Poblacion West, Lamut, Ifugao.

Maibasar iti report ti Police Regional Office Cordillera, ti suspek ket 41-anyos, lalaki ken residente ti Barangay La Fortuna, Impasug-ong, Bukidnon.

Nakalista daytoy kas National Most Wanted Person.

Maipalagip a napasamak ti krimen idi Marso 9, 2005 idiay Lamut, Ifugao nu sadino pinaltugan ti suspek ti biktima a nangitunda iti ipupusay daytoy.

Naiturong metten ti suspek iti Bureau of Jail Management and Penology-Ifugao District Jail idiay Tiger Hill, Baguingey, Kiangan, Ifugao.