BAGUIO CITY – Agpapaimbag ita ti maysa a security officer kalpasan a napaltogan daytoy sadiay Asin Road, Baguio City idi kanikadua.
Nabigbig daytoy a ni Sherwin John Baliwa, 34-anyos ken residente ti Cypress, Irisan, Baguio City.
Nabigbig met ti nangpaltog kenkuana a ni Martin Ngipol, 54-anyos, negosyante ken residente ti Asin Road, Baguio City.
Maibasar iti blotter ti pulisya, inuli ti biktima ti alad ti pagtaengan ti pamilya Ngipol ken nakita ti maysa kadagiti anak ti suspek nga adda ti biktima iti terasa ti pagtaenganda.
Dagos nga inyumanna daytoy iti amana ken sadiay nga inruar ti suspek ti igamna ken pinaltoganna ti biktima gaputa inpagaropna a maysa nga agtatakaw ti biktima.
Natamaan ti kanigid a saka ti biktima a dagos met a naiturong iti pagagasan.
Naamuan a sigud a kaayan-ayat ti biktima maysa nga anak ti suspek.
Naiturong met ti negodyante ken ti igamna iti istasyon ti pulisya para iti kaskenan a disposisyon ti kaso.
