BAGUIO CITY – Nakasaganan ti plano ti Baguio City Jail para iti seguridad ti pito a kadete a suspek iti panag-hazing iti daydi Cadet 4th Class Darwin Dormitorio a posible a maipaima kadakuada.
Iti eksklusibo a panakiyuman ti Bombo Radyo kenni Major Paul Balag-ey, Jail Warden ti Baguio City Jail – Male Dormitory, kinunana nga ur-urayenda laengen ti desisyon para iti panakaiyakar dagiti nasao a kadete iti kustodiyada.
Kinunana a napagdesisyonanna nga iti maymaysa a selda a maibalud dagiti pito a kadete agingga a maka-adjust dagitoy iti biag iti uneg ti baludan.
Innayonna a para metlaeng daytoy iti kinatalged dagiti nasao a kadete gaputa posible nga ibaga dagiti dadduma a balud nga aramidenda kadagiti nasao a kadete ti inaramid dagitoy iti daydi Cadet Dormitorio.
Dinakamat ni Major Balag-ey nga iti saan nga agbayag ket pagsisinaenna ti selda dagiti pito agingga a maka-adaptar ken makinayon dagitoy kadagiti aktibidad ti pagbaludan.
Impettengna a rumbeng a saanda a kigtoten dagti nasao a kadete nangruna ta ‘totoy’ paylaeng dagitoy ken amangan no ma-shock dagitoy iti biag iti uneg ti baludan.
Naamuan kenkuana nga ipaulog to ti korte ti warrant of arrest dagiti nasao a kadete no malpas ti 15-day preliminary investigation kadagiti kaso a naipila kontra kadagiti responsable iti panag-hazing kenni Cadet Dormitorio.
Maipalagip a naipila idi October 8 dagiti kaso kontra kadagiti 7 a kadete, 2 a tactical officers ken 3 a medical personnel ti PMA gapu iti napasamak iti daydi Cadet Dormitorio.
Sigun pay kenni Major Balag-ey, iti kanito a maipaulog ti warrant of arrest ket maipaiman iti Baguio City Jail – Male Dorm dagiti suspek a kadete a sumangsango kadagiti kaso a murder ken panaglabsing iti Anti-Hazing Law ken Anti-Torture Law a bin-ig a non-bailable cases.
