BAGUIO CITY – Ad-adda pay nga iningetan ti pulisya ti seguridad iti centennial celebration ti probinsya ti Abra kalpasan ti insidente ti pammagsol a nakatayan ti maysa nga inibidual ken nakadangran ti lima a dadduma pay.
Kinuna ni Abra PNP Director PSSupt. Alexander Tagum a nasurok iti sangagasut a composite security units ti nakadeploy iti sports complex ken dagitoy ti mangipaay iti nainget a seguridad.
Segun iti pulisya, killaat a dinanog ti 17-anyos a suspek ti maysa kadagiti street dancers ti Tineg nga agbuybuya iti programa a maipatpatungpal iti Abra Sports Complex idi kanikadua.
Inruar ti barito a suspek ti kutsilyo a nakaipit iti siketna ken binagbagsolna dagiti asideg kenkuana.
Naideklara a dead on arrival iti pagagasan ti biktima a ni Jesus Alfredo, 27-anyos a residente ti Canayan, Tineg bayat a natalgeden ti kasasaad dagiti nadangran pakairamanan ti suspek a naiturongen iti Bangued Police Station.
Kabayatanna, saan met a nagbalin a lapped ti napasamak a pammagsol iti 100th Founding Anniversary celebration ti probinsya gaputa naituloy latta ti dadduma a nakalinya nga aktibidad.
Agleppas ti makalaas a festividad inton dominggo a pakaisayangkatan ti nagduduma nga aktibidad.
