BAGUIO CITY – Manamnama a dumur-as ti sektor ti imprastraktura iti probinsia ti Benguet ita a tawen.
Sigun kenni Benguet Representative Ronald Cosalan, nangilatang ti Department of Public Works and Highways (DPWH)-Cordillera iti P4.5 billion a pondo para kadagiti proyekto iti imprastruktura sadiay Benguet ita a tawen.
Kinunana a nangatngato daytoy no idilig iti P3.2 billion a nailatang idi napalabas a tawen a naaramat para iti pannakaituloy ti circumferential road ti Baguio-La Trinidad-Itogon-Sablan-Tuba-Tublay (BLISTT) area.
Impanamnama ti kongresista ti nainget a pannakamonitor dagiti proyekto iti imprastruktura tapno saan a masayang ti pondo a nailatang para kadagitoy.
Sigun kenni Cosalan, maaramat ti P4.5 billion a pondo kadagiti farm to market roads, pannakalawa ti Kennon Road, pannakaikabil dagiti concrete barriers dagiti national road ken dadduma pay.
Namnamaenna pay a babaen iti pannakapasayaat dagiti proyekto iti imprastruktura ket dumur-as ti panabiag dagiti umili sadiay Benguet nangruna dagiti mannalon.
