BAGUIO CITY – Nagbalin a naannayas ken natalged ti panag-obserbar dagiti kailyan a Muslim ditoy lokalidad iti Eid’l Fitr a nangmarka iti panaggibus ti makabulan a panag-ayunar dagitoy iti Ramadan.
Iti interview ti Bombo Radyo Baguio, kinuna ni Imam Abu Yaser ti City Camp a dua nga aldaw sakbay ti Eid’l Fitr ket nagnunumuan dagiti imam ditoy Baguio nga agtungpalda kadagiti paglintegan kontra iti COVID-19 kas iti social distancing ken iti limitasyon iti bilang dagiti mabalin a maurnong a tattao iti maysa a disso.
Kinunana a gapu iti pandemya ket iti laengen babbalayda a rinambakan dagiti Muslim ti Eid’l Fitr ken nangpili laengen ti tunggal pamilya a Muslim iti maysa a kameng ti pamilyada a mangibagi kadakuada kadagiti moske.
Dinakamatna a gapu iti daytoy ket bassit laeng dagiti Muslim a nagturong kadagiti moske ditoy siudad ken naipaayan laeng dagitoy iti 20 a minutos tapnu agkararag.
Imbinglayna a kangrunaan nga inkararag dagitoy kabayatan ti Eid’l Fitr ti panakapukawen ti COVID-19.
Kabayatana, naapektaran ti panag-obserbar dagiti kailyan a Muslim iti North Luzon iti Eid’l Fitr a nangmarka iti panaggibus ti makabulan a panag-ayunar dagitoy iti Ramadan.
Iti interview ti Bombo Radyo Baguio, inlawlawag ni Atty. Raihanah Sarah Macarimpas, Regional Director ti National Commission on Muslim Filipinos-North Luzon nga iti Islam ket nasken nga agmaymaysada nga agkararag babaen iti panag-urnongda kas maysa a kongregasyon kabayatan ti Eid’l Fitr.
Nupay kasta, kinunana a gapu iti agdama a pandemya ket kadagiti laengen mismo a pagtaenganda nga insayangkat dagiti pamilya a Muslim ti panagkararag, kadwa dagiti asideg a kabagianda.
Dinakamatna a sakbay ti pandemya ket kadawyan a dumandanon iti 10,000 a Muslim ditoy Baguio City ti maur-urnong para iti communal prayer tunggal Eid’l Fitr ngem manipud idi napalabas a tawen a naigiddan ti Eid’l Fitr iti Enhanced Community Quarantine.
Pinagyamananna met ti kaadda ti sumagmamano a lugar iti North Luzon a nangipalubos iti limitado a panagu-urnong kas iti siudad ti Baguio a nangitunda tapnu mapatgan ti panagturong dagiti napili a Muslim kadagiti moske tapnu agkararag.
Innayon ni Atty. Macarimpas a paset ti selebrasyonda ti Eid’l Fitr ti panagkiddaw ti pammakawan kadagiti napasaktanda, panangkablaaw kadagitoy, panagaramid ti naimbag a nakem kadagiti agkasapulan a kailyanda, panangisagana iti taraon ken panagsasango dagiti agkakabagian ken agpapagayam.
