BAGUIO CITY–Balballaagan ti City Health Services Office ti publiko manipud kadagiti mailaklako a self-testing kits nangruna iti online.
Sigun kenni Dr. Donnabel Tubera-Panes, Medical Officer IV ti City Health Services Office, saan a dimmalan iti Food and Drug Administration(FDA) dagiti mailaklako a self-testing kits.
Kinunana mangitunda daytoy iti panagpanik ti publiko nangruna no positibo iti COVID-19 virus ti resulta a naiparang iti self testing kit bayat nga agbalin dagitoy a kampante no negatibo ti maiparang a resulta.
Dinakamatna a saan nga umiso dagiti magatgatang a self testing kits nangruna iti online isu’t gapuna nga iyap-apela ti opisial ti panagtalek ti publiko kadagiti eksperto ti salun-at seknan iti panagresponde ti mapaspasaran a COVID-19 pandemic.
