Impasigurado ni Senate Committee on Energy Chairman Erwin Tulfo a saan a mabalin nga ibawi iti dadduma a singir iti electricity bill ti naikissay iti system loss charges.
Kasaruno daytoy iti panangiyebkas dagiti sumagmamano a konsyumer nga amangan nu ibawi metlaeng dagiti electric company ti naikissay iti system loss charge babaen iti panangingato iti distribution, supply, wenno dadduma pay a paset iti electricity bill.
Sigun kenni Tulfo, nalawag iti Senate Bill No. 2486 wenno Systems Loss Charge Removal Act a saan a mabalin nga irecover ti distribution utilities ken electric cooperatives ken allowed losses babaen iti dadduma pay a charges.
Karamanen ditoy ti distribution wheeling charges, supply charges, metering charges, universal charges ken subsidies, kasta metten kadagiti nagduduma a paset iti electricity bill.
Maipalagip nga inisponsoran ni Tulfo iti plenaryo idi Setyembre 22 ti nasao a gakat pakairamanan dagiti priority measure ti administrasyon.
Impetteng ti senador a saan a rumbeng nga ipabaklay kadagiti konsyumer dagiti saanda met a naaramat.