Imbutaktak ni Senator Imee Marcos a naitukon ti dakkel nga “incentive package” kadagiti kongresista tapno maisugurado nga agbotosda iti “yes” iti pannakaimpeach ni Vice President Sara Duterte.
Daytoy ti kinuna ni Sen. Marcos, sumagmamano nga aldaw sakbay a nagbobotos dagiti House of Representatives.
Impetteng ti Senadora a karaman iti maipagarup nga offer ti P5 million a cash, P3 million a kanayonan a Maintenance and Other Operating Expenses (MOOE) iti tunggal bulan, ken P150 million a balor dagiti proyekto.
Iti sabali a bangir, dagiti agbutos iti “no” ket maatap a saan a maipaayan iti pondo ken posible a sumango iti legal charges.
Inyunay-unay ti presidential sister a para laeng daytoy kadagiti kongresista bayat nga awan ti naidiaya kadagiti Senador.
