Kinuwestionaran ni Senator Panfilo “Ping” Lacson ti P1.9 Trillion a pondo para iti flood control projects ti gobyerno kalpasan a nakapadas manen iti panaglayos ti sumagmamano a lugar iti pagilian gapu iti awan sarday a panagtudtudona.
Sigun kenni Lacson, dumanon iti P1.939 trillionen ti ginastos ti Department of Public Works and Highways (DPWH) para iti flood control management program manipud 2011 agingga 2025.
Ngem iti baet ti nangato a budget dagitoy, agtultuloy latta ti mapaspasaran a panaglayos kadagiti addu a lugar iti pagilian pakairamanan ti Metro Manila.
Impettengna a rumbeng a maadal a nalaing nu epektibo metlaeng dagiti flood control projects ti DPWH nangnangruna ta agtultuloy pay laeng ti mapaspasaran a panaglayos .
Immuna metten a nangiruwar ti Sen. Lacson iti alegasyon seknan iti maatap a naanomalyaan a proyekto iti sumagmamano a flood control projects idiay Bulacan ken Oriental Mindoro.
Sigun pay iti senador, nagsumitir metlaengen daytoy kadagiti ebidensya iti Office of the Ombudsman seknan iti sumagmamano a maatap a naanomalyaan nga slope protection projects ken ilegal a reclamation activities idiay Taguig City. //𝒦cs//