Inyunay-unay ni Senate Majority Leader Joel Villanueva nga awan ti Senador kadagiti 15 a kontractor iti P545-billion flood control program.
Kasaruno daytoy iti imbutaktak ni President Ferdinand Marcos Jr. a 20 percent ti naala dagiti firms manipud kadagiti flood control program.
Sigun kenni Villanueva, awan ti makitana a senador a karaman kadagiti 15 construction firms.
Mainaig iti dayta, impetteng daytoy nga adda iti Presidente ti pangngeddeng no agresign ni Department of Public Works and Highways (DPWH) Secretary Manuel Bonoan bayat a maisaysangkat ti imbestigasion seknan iti maatap a korapasion iti DPWH.
Kabayatanna, impaganetget ni Villanueva ti kinapateg ti patas nga imbestigasion ken addaan iti kredibilidad, tapno masigurado nga awan ti makaliklik ken sungbatan dagiti responsable ti anyaman a maduktalan nga anumalya.
