Indatag ni Senador Win Gatchalian ti pakaseknan iti kinakurang dagiti prinsipal ti pagadalan iti pagilian a Pilipinas, nga impaganetgetna ti kritikal nga akemda iti pannakaipatungpal dagiti reporma kadagiti pagadalan.
Iti maysa a statement, inladawan ni Gatchalian a makapadanag ti kasasaad ken indagadagna iti Department of Education (DepEd) nga i-update dagiti “outdated policies” tapno mataming ti isyu.
Kidkiddawen pay ti senador ti oportunidad para kadagiti mannursuro a mai-promote kadagiti posision a prinsipal.
Idurduron pay ti senador nga agbalin a linteg ti Career Progression System, a mangpalawa iti oportunidad para kadagiti mannursuro, school administration ken supervision.
Maipalagip a kinuna ti Department of Education a panggepda a mangimplementar ti one-principal-one-school policy kalpasan a naiparang iti report manipod iti Second Congressional Commission on Education (EDCOM II) nga agarup 24,000 a parapubliko a pagadalan ket agkurkurang iti school heads.
Immunan a dinakamat ni Education Secretary Sonny Angara nga adalen ti ahensia ti pannakaiwaras dagiti kualipikado a prinsipal iti intero a pagilian.