Kiniddaw ti Senate Ethics Committee kenni Senator Ronald “Bato” dela Rosa nga agipaay daytoy iti komento seknan iti singasing a mangamyendar kadagiti pagalagadan ti senado tapno ipatungpal ti ‘no work, no pay’ policy para kadagiti aglanglangan a senador.
Sigun kenni Senate Ethics Committee Chairperson Senador JV Ejercito, tinalantan ti komite dagiti nagduduma a reklamo kontra kadagiti miyembro ti Senado, pakairamanan ti gakat a mang-istrikto iti absenteeism.
Kagiddan dayta, nangipatulod ti komite kenni Dela Rosa tapno agkomento daytoy seknan iti nasao a singasing.
Maipalagip a nabayagen a saan a nag-atatendar ni Sen. Dela Rosa manipud Nobyembre idi napalabas a tawen kalpasan iti maatap a panangipaulog International Criminal Court (ICC) ti warrant of arrest kontra kenkuana gapu iti pakainaiganna iti war on drugs campaign ni sigud a president Rodrigo Duterte.
Gapu iti daytoy, sumangsango ni Sen. Bato iti ethics complaint gapu iti tuloy-tuloy a panaglanganna kadagiti sesyon ti senado.
Mangnamnama met ni Sen. Ejercito a boluntaryo nga isuko ni Sen. Bato ti sweldo ken allowances daytoy gapu saan daytoy nga aktibo iti panangatendar kadagiti sesyon ti senado , kas panangipakita ti patas a prinsipyo kadagiti ordinaryo a mangmangged a saan a mabaybayadan tunggal aglangan dagitoy. //bombokaren.c.s