Impetteng ni Senator-Judge Alan Peter Cayetano iti Korte Suprema a rumbeng a mailawlawag ti voting threshold para iti conviction iti mannarimaan nga impeachment trial ni Vice President Sara Duterte.
Sigun kenni Senator Cayetano, saanna a lapdan ti panagtalantan iti threshold ngem binabalawna ti timing ti panangresolba iti nasao nga issue iti katengngaan iti impeachment trial.
Patienna a rumbeng a nailawlawag ti nasao nga issue sakbay a naaprubaran dagiti pagalagadan para iti panagdengngeg.
Impaganetget metlaeng ti senador a mabalin a kuwestionaran ti Korte Suprema ti agbalin a resulta ti impeachment proceedings isu’t gapunna a rumbeng a siguradoen ti senate impeachment court nga awan ti agbalin nga aberya iti hurisdiksyon wenno panangabuso iti bileg iti agbalin a desisyon dagitoy.
Nagballaag metlaeng ni Senator Cayetano iti posible nga epekto ti panagbaliw iti bilang dagiti senador a pagbasbasaran iti panangkwenta iti 2/3rds requirement bayat iti panagtultuloy ti panagdengngeg.
Impettengna a seryoso a banag ti impeachment process ken saan a rumbeng a pabaliw-baliw ti basaran ti desisyon iti katengngaan ti panagdengngeg.
