Pinalubosan ti Sandiganbayan 5th Division ni Senator Jinggoy Estrada a temporaryo a rumuar manipud iti New Quezon City Jail inton bigat tapno agpa-Xray iti tumengna iti maysa a pribado a pagagasan.
Iti resolusyon nga impaulog ti korte, napalubosan daytoy a rumuar manipud alas-11 ti agsapa agingga alas-tres iti malem apaman a malpas ti medical appointment daytoy.
Kasapulan metlaeng a kaduaan daytoy dagiti security escorts bayat nga ada daytoy iti ruwar ti pagbaludan.
Nailanad metlaeng iti resolusyon a kasapulan a sungbatan mismo ti senador amin a gastusenna iti pagagasan, medical fees, transportasyon,ken dadduma pay a mabayadan iti panagpatamingna.
Immuna metten a kinumpirmar ti legal counsel ti senador nga addaan daytoy iti osteoarthritis iti agsinnumbangir a tumengna.
Mannarimaan a nakabalud ti senador gapo kadagiti kaso a plunder ken graft nga adda pakainaiganna iti maatap a naanomalyaan a flood control projects