Impakaammo ni Senator-judge Robin Padilla a maysa a komunista bayat ti panagdamagna kenni NBI-Bangsamoro Autonomous Region in Muslim Mindanao (BARMM), Regional Director Atty. Jeremy Lotoc iti maikalima nga impeachment trial ni Vice President Sara Duterte idi Martes, Hulyo 14.
Kabayatanna, dinamag ni Padilla kenni Atty. Lotoc ti maipapan iti pakasaritaan dagiti Romanov, ti maudi a pamilia dagiti tsar sadiay Russia a napapatay bayat ti Russian Revolution.
Sigun iti senador, mabalin nga iyarig ti “Romanov” iti pangta kontra kadagiti agturturay a pamilia a mangidadaulo iti kampania kontra kadagiti rebelde a komunista.
“Hindi ba po dapat isipin natin yung Romanov ay tungkol sa threat na pumapasok sa mga pamilya na mga namumuno dito sa ating bayan na lumalaban sa komunista?” damag ni Padilla
Nupay kasta, nagkedked ni Lotoc nga umanamong iti interpretasion ti senador.
Sigun kenkuana, ti banag maipapan iti “Operation Romanov” ket adda iti sidong ti imbestigasion ti intelligence service ti NBI.
“So far as the investigation on the issue of whether or not may Romanov or Operation Romanov, nasa intelligence service po namin ‘yan. I think ang makakasagot po niyan ay ang director po namin,” sigun kenni Lotoc.
Dinakamat metlaeng ni Padilla a mabalin a sanguen ni Vice President Sara Duterte ti kapada a pangta gapu iti akemna a mangidaulo iti National Task Force to End Local Communist Armed Conflict wenno NTF-ELCAC.
Ngem sigun kenni Lotoc, awan ti personal a pannakaammona iti aniaman a pangta kontra iti Bise Presidente.
