Saan nga immannugot ni Senator Loren Legarda iti panakairaman iti Antique iti listaan dagiti lugar a posible a pakaimuntaran iti nuclear facility iti pagilian.
Sigun kenni Senator Legarda, saan a maiparbeng ti Antique a pakaimuntaran iti nasao a pasilidad gapu ta masansan daytoy a malayos, ken adda dagiti agnanaed sadiay a katutubo.
Inaklon ti senadora a naklaat daytoy idi naduktalanna ti panakairaman ti nasao a probinsya kadagiti nairekomendar a site para iti nuclear energy.
Impetteng ni Senator Legarda a lapdanna ti amin nga addang iti panakaipatungpal daytoy nu sadino, kiniddawnan iti ahensya iti gobyerno a mangad-adal iti daytoy nga isardengdan ti agregget gapu ta uray ti pondo para iti daytoy ket panggepna a lapdan.
Mainaig iti dayta, immapelan ti senadora iti Department of Environment and Natural Resources(DENR) nga ikkatendan ti Antique iti listaan dagiti site para iti nuclear energy.
