Agarup 1,000 a mangmangged ken Small Livelihood Earners ti nakaawat iti food packs manipud kennni Senator Lito Lapid babaen iti Department of Social Welfare and Development (DSWD) idiay Pinewoods ken Camp John Hay Country Club itay nabiit.
Karaman kadagiti benepisyaryo dagiti pony boys, dagiti aglaklako iti taho, balut, ken chicharon, market vendors, security guards, waiter, maintenance workers, ken restaurant employees.
Ti nasao a tulong ket personal nga inwaras ken impaay ti nasao a senador.
Sigun kenni Senator Lapid, bassit man ti nasao a tulong ngem namnamaenna a makatulong latta daytoy kadagiti pamilya dagiti benepisyaryo.
“Maliit man ang tulong na ating naibahagi, makatutulong pa rin ito bilang pantawid sa pang-araw-araw na pangangailangan ng bawat pamilya,”sigun kenni Senator Lapid.
Kabayatanna, impetteng met ni Baguio City Councilor Edison Bilog a ti tulong nga ipapaay ni Lapid ket saan laeng a babaen iti panangipaayna iti food packs nu di ket babaen kadagiti dadduma pay a programa ken proyekto kas iti panangpondo ti Tourism Infrastructure and Enterprise Zone Authority (TIEZA) nga idadauloan ti anakna a ni Mark Lapid, kadagiti sumagmamano a proyekto iti siyudad nangnangruna ti pannakapasayaat dagiti tourism facilities.
Mainaig iti dayta, nagyaman met ni Arnel Cayatoc, mangidadaulo iti Pony Boys Association iti siudad ti Baguio kenni Senator Lapid ken iti annakna gapu iti awan sarday a panangipaayda iti tulong nangruna kadagiti vulnerable residents iti probinsya ti Benguet.
Daytoy metten ti maikadua a gundaway a bimmisita iti siyudad ti senador ita a bulan tapno personalna nga ipaay ti tulong kadagiti benepisyaryo. // via Bombo Noveh Organo
