Nangipaay wenno nangiwaras ni Senator Lito Lapid kadagiti family food packs iti agarup 500 caddies ken maintenance workers manipud iti Department of Social Welfare and Development (DSWD)office ken Office of the City Social Welfare Development ita a malem iti siudad ti Baguio.
Nakipaset metlaeng ditoy ni Vice Mayor Faustino Olowan, Councilor Edison Bilog, CSWDO Officer Liza Bulayungan ken daduma pay.
Nakisabat met ditoy ni Mayor Julius Amos manipud Munisipyo ti Buguias, Benguet tapno ipaay ti Certificate of Appreciation kenni Senator Lito Lapid gapu iti suportana iti Assistance to Individuals in Crisis Situation (AICS).
Sigun kenni Sen. Lapid, idi pay laeng kuma napalabas a lawas daytoy nga umay iti siudad ti Baguio ngem nagsinnukatda iti anakna a ni Mark Lapid gapu iti opening ti Burnham Lake idi Setiembre 1.
Innayon daytoy a nabayag nga awan ti pammastrekan dagiti caddies gapu iti saan a nasayaat a paniempo.
Impeksana pay nga addan ti naipaay a tulong manipud kenni Congressman Mauricio Domogan ngem impetteng ti senador a nasken a manayunan daytoy, rason tapno makikoordinar ken agkiddaw daytoy iti tulong manipud iti DSWD ken CSWDO.
Kabayatanna, agyamyaman met ni alyas “Jimmy” gapu iti tulong a naipaay kadakuada gapu ta sigun kenkuana, nasurok makabulan nga awan ti kita ti pamastrekan dagitoy gapu iti diretso a panagtudtudona. Sigun kenkuana, dakkel daytoy a tulong para kadakuada.
Mainaig iti dayta, agturong met ti senador idiay Zambales partikular idiay Sta. Cruz, Masinloc, San Marcelino, Botolan, Olongapo City ken Lubao, Pampanga inton bigat tapno mangitulod metlaeng kadagiti food packs iti biktima ti layos sadiay.
Agarup lima ribo a pamilya ti target dagitoy a maipaayan iti tulong manipud iti DSWD Food Packs nga in-initiate ti senador. // via Bombo Noveh Organo
