Inawagan ni Senator Rodante Marcoleta a “marites” ni Department of Justice Secretary Frederick Vida, mainaig iti maatap a pannakaarestar ni sigud a congressman ken pugante a ni Zaldy Co.
Sigun kenni Marcoleta, pagarupenna ni Vida ti nangipaay iti saan a beripikado nga impormasyon kenni President Ferdinand Marcos Jr., seknan iti pannakaarestar ni Co sadiay Czech Republic.
Innayon pay ni Marcoleta a daytoy ti makagapo a nagturong sadiay Czech Republic ni Vida tapno makompirmar ti pannakarestar ni Co.
Sigun pay iti senador, no pudno a naarestar ni Co, rumbeng a naipatungpal a dagus ti consular notification process no sadino, naipakaammo iti maseknan nga embahada ti pakabigbigan ti naarestar, naibalud ken sumaruno ti legal nga addang.
Iti agdama, awan paylaeng ti opisial a pammatalged manipud kadagiti autoridad ti Czech Republic maipapan iti naipadamag a pannakaibalud ni sigud a congressman Co.
