Kinumpirmar ni Senator Ronald “Bato” dela Rosa a daytoy ti naudi a pasahero nga imbaba ti chopper a nagcrash sadiay Barangay San Miguel, Guimba, Nueva Ecija idi napalabas a lawas.
Sigun kenni dela Rosa, ti babai a piloto ket agmaymaysa a nagsubli kalpasan nga imbatina daytoy ken ti dua a security aidesna iti siudad ti Baguio.
Daytoy ket gapu ta addaan iti appointment ti senador iti siudad ken nagbyahe daytoy sadiay Bimmaley, Pangasinan para iti founding anniversary ti nasao a lugar.
Innayon ni Dela Rosa nga awan ti napansinna nga problema iti engine kasta met a nasayaat ti paniempo iti dayta a panawen.
Kabayatanna, inyebkas ni Dela Rosa ti panakaipagladingitna iti pamilya ti 25-anyos a babai a piloto.
Maipalagip nga idi napalabas a lawas ket naalerto ti Guimba Police Station kalpasan a maysa a light helicopter ti nagcrash iti kataltalonan.
Iti agdama, manarimaan ti imbestigasyon ti Civil Aviation Authority of the Philippines (CAAP) iti nasao nga insidente.
