Impeksa ni Senator Ronald Dela Rosa a situtulok daytoy a mangidaulo iti imbestigasion ti drug war ti Senado iti baet a kinontra daytoy dagiti sumagmamano a sendor, nu sadino kinunana a nalawag a conflict of interest daytoy.
Sigun kenni Dela Rosa, kas chairman ti Senate public order and dangerous drugs committee, mabalin a mangipatungapal iti motu proprio tapno maimbestigaran ti war on drugs iti administrasion ni sigud a presidente Rodrigo Duterte.
Nupay kasta, nababalaw daytoy agsipudta maysa daytoy a hepe ti Philippine National Police idi naipatungpal ti war on drugs iti napalabas nga administrasion.
Maipalagip nga immunan a binalakadan ni Senate President Francis “Chiz” Escudero ni Senador dela Rosa a saan a mangidaulo iti aniaman nga imbestigasion mainaig iti war on drugs iti Duterte administration.
Nupay kasta, impaganetget ni Dela Rosa nga ipakitana iti publiko a patas daytoy ken awan ti sabali a panggepna, no maipaayan daytoy iti gundaway a mangidaulo iti imbestigasion.
Kabayatanna, kayat ni Senator Risa Hontiveros nga idauluan ti komite ti pakabuklan nga imbestigasion tapno makasao dagiti biktima iti war on drugs nga awan ti pagbutnganda.
