Agtaltalinaed a silulukat ni sigud a Senador Antonio Trillanes IV nga agserbi kas prosecution witness iti impeachment trial ni Vice President Sara Duterte.
Sigun kenni prosecutor Bicol Saro Party-list Rep. Terry Ridon, karaman ni Trillanes iti listaan dagiti posible nga agtestigo, ngem awan paylaeng ti pinal a pangeddeng no pormal nga agtestigo daytoy.
Maipalagip a nagtestigo ni Trillanes iti sangwanan ti House Committee on Justice idi Abril no sadino, kinunana nga agarup P2.407 billion ti linaun ti joint bank accounts nga iggem da Vice President Sara Duterte ken ti amana a ni sigud a President Rodrigo Duterte manipud 2003 agingga 2016.
Sigun iti sigud a senador, naibasar dagiti bilang iti bank records nga impaay kenkuana ti maysa a source ken nasukimat babaen iti tulong dagiti accountant ken financial specialists.
Immuna nga indatagna dagiti alegasion a pakainaigan dagiti bank accounts ni Duterte bayat ti 2016 presidential campaign.
Nangidatag pay ni Trillanes kadagiti rekord ti transaksion a nakairamanan da Duterte, ti asawana a ni Atty. Manases “Mans” Carpio ken dadduma pay a kameng ti pamilia Duterte.
Pinasingketan dagiti opisial ti Anti-Money Laundering Council (AMLC) a sumagmamano a transaksion nga indatag ni Trillanes ket agpada iti rekord dagitoy.
