Saan a pabor dagiti senatorial aspirants a da Benigno “Bam” Aquino IV ken Attorney Vic Rodriguez iti pannakaisakad ti gakat nga agbalin a ligal ti absolute divorce iti Pilipinas.
Sigun iti dua, ad-adda kitdi kuma a ti annulment ket rumbeng a maaramid nga “affordable” ken “accessible” kadagiti Pilipino.
Kinuna ni Aquino a ti divorce iti Pilipinas ket “divisive” bayat a kinuna met ni Rodriguez a saan daytoy a komportable iti panangiligal ti doborsio.
Dinakamat pay ni Rodriguez ti probision ti Article 2 Section 12 ti 1987 Constitution a mangbigbig iti kinasanto ti biag ti pamilia.
Idi Hunio idi napalabas a tawen, nai-transmit iti Senado manipod iti House of Representatives ti gakat nga Absolute Divorce Bill kalpasan a naaprobaran iti maikatlo ken maudi a pannakabasana.
Immunan a kinuna ni Senate President Pro Tempore Jinggoy Estrada a ti gakat ket saan a prayoridad ti Senado, ken inaklonna a kontra daytoy iti nasao a gakat.
Kinuna met ni Senate President Francis Escudero a saanna a makitana no kasano a makatulong ti nasao a gakat kadagiti marigrigat gapu ta saan a palubosan ti Public Attorney’s Office a mangala kadagiti kaso.
