Saanen a maipasidong iti otopsiya ti bagi ti maysa nga indibidual a nasarakan nga awanan iti biag idiay Ampasit, Puguis, La Trinidad,Benguet idi laeng January 6.
Sigun kadagiti otoridad, saanen nga immanugot ti pamilya ken kakabagyan ti pimmusay a senior citizen gapu ta patien dagitoy nga awan ti napasamak a foul play iti ipupusay daytoy.
Maibasar iti imbestigasyon, nabati ti nasao a senior citizen iti balayda bayat a simrek iti pagadalan ti agtawen iti 17 nga anak daytoy agarop 12:00 PM idi pangngaldaw iti nadakamat nga aldaw.
Idi simmangpet manipod pagadalan ti nasao nga agtutubo pasado 5:00 iti malem, nadanunanna ti amana a nakaidda nu sadino, idi asetgan ken iggamanna ket nalamiisin daytoy.
Dagus a nagpaarayat ti barito ken naitaray met iti kaasitgan a pagagasan ti ama daytoy ngem saanen a naispal ken naideklara a dead on arrival.
Kabayatanna, imbinglay ti maseknan a barito a siguden a nakapasar iti panaka-stroke ti ama daytoy.
Malaksid iti dayta, sakbay ti ipupusay ti amana ket maipaspasidong metlaeng daytoy iti dialysis gapu iti sagsagabaenna a kidney failure iti agarop tallo a tawen nu sadino, addaan pay daytoy iti medikasyon.//Bombo Noveh Organo
