BAGUIO CITY – Pinadayawan ti lokal a gobyerno ti Baguio ti maysa a senior citizen a retired police officer kalpasan a nakaiyawid ti uppat a balitok a medalya iti naangay nga South East Asia Athletics Championship sadiay Singapore.
Nagun-od ni Erlinda Lawandia, 67-anyos, retirado a police chief inspector ti uppat a gold medals manipud iti ay-ayam a javeline throw, discuss throw, shotput ken hammer throw.
Nabigbig pay ni Lawandia kas Best Female Athlete in Field kalpasan nga inabakna dagiti atleta manipud sadiay India, Malaysia ken Singapore.
Naituding nga ibagina ti Pilipinas iti maangay nga Asian Masters Athletic Championship sadiay Kuala Lumpur, Malaysia inton November 28 agingga December 9, 2019.
Nangipaay met ti city government iti insintibo kenni Lawadia kas gungunana iti panangital-ona iti nagan ti Baguio City ken ti pagillian iti international events.
