BAGUIO CITY-Nasurok P400K a kwarta ti naitaray maipud iti maysa a senior citizen kalpasan a biniktima daytoy ti budul-budol gang sadiay Session Road, ditoy siudad ti ng Baguio idi kalman.
Sigun iti pulisya, nasabat ti biktima dagiti suspek a maysa a lalaki ken dua a babae sadiay Session Road ken dinamag dagitoy no ti biktima ket taga-Baguio City agingga a dinakakamatda nga agipasdekda ti negosyo ditoy siudad ngem agkasapulanda ti tulong manipud iti mismo a taga-Baguio.
Impasigurado dagiti suspek a maala ti biktima kas assistant ken ipaiggemda iti daytoy ti dakkel a gatad ngem impeksada a kasapulanda ti pang-iggeman a saan a tumaray ti biktima.
Dinamagda ti biktima no adda ti dakkel a gatad ti kwartana agingga a napanda iti balay ti biktima tapnu alaen ti passbook daytoy.
Inala amin ti biktima ti kwartana iti passbook a P437K ken inrikepna pay ti account a kas iti imbalakad dagiti suspek nangruna ta kinunada nga agdoble ti nasao a gatad.
Kalpasanna, inala dagiti suspek ti kwarta ti biktima ken sinukatanda iti bag ken binilinda nga agura sadiay Sessin Road.
Nupay kasta, naduktalanna laengen a papel dagiti linaon ti nasao a bag a rason tapnu agkamang iti pulisya.
Immuna iti daytoy, idi Dominggo ket maysa metlaeng a senior citizen ditoy siudad ti naalaan ti P23,000 a kwarta ken singsing nga aggatad ti P8K kalpasan a nabiktima daytoy iti budul-budol gang.
