BAGUIO CITY – Manamnama a makaawat ti P10,000 dagiti senior citizens a makadanon iti tawen nga 80, 85, 90 ken 95 bayat a makaawat met dagiti agtawen ti 100 ti P100,000.
Daytoy ket kagiddan ti pannakapirma ti Republic Act 11982 wenno ti Expanded Centenarians Act a nang-amyendar iti Republic Act 10868 wenno ti Centenarians Act of 2016 ngem maur-uray paylaeng ti Implementing Rules and Regulations daytoy.
Gapu iti dayta, agtultuloy ti panag-allukoy ti National Commission of Senior Citizens – Cordillera nga agparehisto dagiti saan pay a nakarehistro a senior citizens iti rehiyon.
Babaen iti daytoy ket maiyaramidanda ti Elderly Data Management System tapno mamonitor dagiti octogenarian, nonagenarian, ken centenarian ditoy Cordillera.
Iti agdama, agarup 118,000 ti nakarehistro a senior citizen iti Cordillera kas maibasar iti datus idi Marso singko iti agdama a tawen.
Mapalpalagipan met dagiti agparehistro nga agturong laeng dagitoy kadagiti opisina ti senior citizens iti masakupanda a munisipyo.
Para met kadagiti residente ti Baguio City, agturong laeng kadagiti registration stalls idiay Igorot Garden, Center Mall, PortaVaga, Kayang Street bayat a dagiti umili iti La Trinidad ket agturong laeng iti sango ti La Trinidad Public Market.//Bombo Jerwin Aquino
