BAGUIO CITY – Nakemmeg ti maysa a sevice crew iti uneg ti maysa a convenience store sadiay Shanum Street, siudad ti Baguio gapu iti panag-imetna iti paltog nga awanan ti lisensia.
Nabigbig daytoy a ni Rocky Vinuya Ramos, 27-anyos, awanan asawa, tubo ti Lingayen, Pangasinan ken residente ti P. Zamora St., siudad ti Baguio.
Sigun kenni PCI Marlo Evasco, commander ti Bagiuo City Police Office – Station 7, nakaawat ti BCPO iti tawag manipud iti gwardiya ti convenience store a pagtatrabahuan ti nasao a lalaki seknan iti imet daytoy a paltog.
Kinunana a dagus a nagresponde dagiti pulis ken sadiay a kinemmegda ni Ramos ken nakumpiskarda manipud iti ikot daytoy ti maysa a caliber 38 revolver.
Dinakamatna a napaay ni Ramos a nangiparang iti kaskenan a dokumento ti nasao a paltog a nangitunda iti panakakemmeg daytoy.
Sumangsango ti nasao a lalaki iti kaso a panaglabsing iti RA 10591 wenno ti Comprehensive Firearms And Ammunition Regulation Act ken iti Omnibus Election Code.
