BAGUIO CITY – Iyap-apela dagiti mangimatmaton iti Mount Pulag National Park ti panag-aksion ti National Commission on Indigenous Peoples iti panagpuor dagiti umili iti sumagmamano a paset ti Mount Al-al sadiay Kabayan, Benguet tapnu pagbalinen a pagmulaan.
Iti interview ti Bombo Radyo Baguio, kinuna ni Mount Pulag National Park Superintendent Emerita Albas nga adda dagiti umili sadiay a mangtagtagikua iti paset ti Mount Al-al ken mangisaysayangkat ti panagkaingin iti nasao a bantay.
Sigun kenkuana, kagiddan ti panaginspeksion ti lokal a gobyerno ti Kabayan ken ti Department of Tourism iti Mount Al-al para iti panakaital-o daytoy a national park ken para iti turismo ket rinugian met dagiti saan pay a nabigbig a residente sadiay ti panag-uram ken panagkaingin.
Dinakamatna a naobserbaran ti rinabii a panagturong dagiti mapapati a residente iti nasao a bantay isut gapuna nga awan ti maak-aktuwanda kadagiti mangisaysayangkat ti panagpuor.
Innayonna nga in-inot ti panagkaingin dagiti saan pay a nabigbig nga indibidual kadagiti tagtagikuaenda a paset ti bantay.
Gapu iti daytoy, inyapela ni Albas ti dagus a panakaireport kadakuada wenno iti barangay dagiti indibidual nga agar-aramid kadagiti aksion a mangituntunda iti panakadadael ti Mount Al-al.
