BAGUIO CITY- Pormal a naglukat ita nga aldaw ti Session Road in Bloom a paset ti selebrasyon ti Panagbenga Festival 2022.
Gapu iti dayta, nangrugi metten iti pannakairikep ti dua a linya ti Session Road ken pannakaiparang dagiti nagduduma a produkto a mailako kadagiti stalls a naimuntar iti nasao a kalsada.
Iti interview ti Bombo Radyo Baguio ken HRAB President Andrew Pinero, manipod iti sigud a 500 a stalls ket dumanon laengen iti 208 dagiti stalls a naimuntar sadiay.
Kinunana a dagiti negosyante ditoy syudad ti 80% kadagitoy bayat a ti nabatbati a 20% ket dagiti nagtaod iti dadduma a lugar.
Malaksid iti dayta, adda pay dagiti kanayunan a stall babaen met iti Liga ng mga Barangay.
Innayunna nga adda iti nailatang a 1.5 meters a distansya kadagiti stalls tapnu maipasigurado ti social distancing kasta metten a maipalpalagip latta iti umno a pannakasurot dagiti minimum public health standards kontra COVID19.
Mainaig iti dayta, iyaw awis ni Pinero iti publiko iti pannakipasetda kadagiti nagduduma nga aktibidad a maangay kabayatan ti Session Road in Bloom partikular iti pet fashion show, quiz bee ken nagduduma a performance a mabalin a maipabuya sadiay.
Agpaot met ti Session Road in Bloom agingga inton Marso 27, 2022
