Kinumpirmar ni Sheila Guo iti senado a kaduana ti kakabsatna a nagtalaw iti Pilipinas karaman ni dismissed Bamban, Tarlac mayor Alice Guo ken Wesley Guo babaen ti bangka.
Sigun kenni Guo, nagsakayda a tallo iti van a nagtaud iti farm dagitoy idiay Tarlac ken nagbiahe dagitoy nga agpaabagatan manipud oras ti pangrabii agingga iti tengnga ti rabii.
Nupay kasta, saanna nga ammo nu sadinno ti lokasion ti naglugananda a bassit a bangka a maris puraw, a makalon laeng ti agingga sangapulo a tao.
Nagakar dagitoy iti dadakkel a bangka, ken iti maikadua a bangka a mapapati a “fishing ship” gaputa addaan daytoy ti net, sigun paylaeng kenni Guo.
Kalpasan ti panagbiaheda iti mapapati a “fishing ship”, nagakar manen dagitoy iti basbassit a bangka.
Positibo a ti maudi a bangka ket paturong idiay Malaysia.
Nagparang ni Guo iti panagdinggeg gaputa agdama a naibalud daytoy iti Senado.
Ni Sheila ken Cassandra Li Ong ket natiliw idiay Indonesia idi napalabas a lawas.
Maipalagip a ni Sheila Guo ket maysa kadagiti imbilin ti Senado a makemmeg idi Hulio.
