Agparparang a short circuit iti maysa a balay ti rason ti uram a napasamak idiay Camp 6 Tuba,Benguet idi January 1.
Sigun iti kaudian a datos manipod iti imbestigasyon nga imbinglay ni Camp 6 Barangay Captain Johnny Dogao iti Bombo Radyo, 27 itan ti pasdek a nauram pakairamanan ti maysa a kapilya, bayat a dumanon met iti 159 nga indibidwal dagiti naapektaran.
Nupay kasta, awanen kadagitoy ti agtaltalinaed kadagiti evacuation centers iti agdama gapu ta napandan nagkamang kadagiti kakabagyanda bayat a dagiti daduma ket temporaryo a nagdagus kadagiti bakante a boarding house.
Sigun kenni Dogao, dagiti kangrunaan ita a kasapulan dagiti naapektaran ket taraon ken ti gatad nga aramatenda tapno rugian manen dagiti pagbiaganda.
Kabayatanna, saanen a nanayunan ti bilang ti pimmusay kasta met dagiti nadangran.
Immunan a nakumpirmar ti ipupusay ti maysa nga indibidwal a nabigbig iti nagan nga Eric Pacio, agtawen iti 39 ken residente metlaeng iti nasao a lugar.
Iti impormasyon nga imbinglay ti kapitan, maatap a nabartek daytoy idi napasamak ti uram rason a saanen nakaruar iti ayanna.
Iti sabali a bangir, awan met ti nailista a kaso iti fireworks-related injuries iti nadakamat a barangay bayat ti isasangbay iti baro a tawen.//Bombo Rob Dominguez
